【明報】419教徒海灘受浸 (2014-09-15)
【明報專訊】噚日汀九麗都灣有超過400人集體行「下水禮」，佢哋唔係9月先至迎夏日，而係下水受浸。位於荃灣嘅611靈糧堂已經係第六年將基督徒洗禮儀式由教會禮堂移師海灘，負責主持儀式嘅牧師萬偉玲話，除咗浸禮，現場亦有佈道傳福音環節，希望趁機會將教會內嘅屬靈氣氛帶到教會外，感染整個社區。
萬牧師又話，受浸嘅信徒男女老少都有，年紀最細得9歲，最大94歲，總共有419人，「呢幾年都有四五百人一齊受洗，長遠目標係1000人，所以命名『千人海灘浸禮』，以示決心」。
KOLOR前成員講戒毒經歷
最近藝人吸毒事件不斷曝光，萬牧師話，今年特別請來前藝人、樂隊KOLOR前結他手高耀豐講佢喺娛樂圈受朋友影響染上毒癮，後來甚至出現幻覺被送院，以及因信仰成功戒毒嘅經歷，希望耀豐嘅見證幫到其他徘徊毒海嘅年輕人。